សុខភាព ២ របបអាហារសំរាប់ជីវិតអ្នក | Voice of Hope Studio

Health & Welfare Chapter 02 Diet for a Lifetime | Voice of Hope Studio

ឧបមាថាលោកអ្នកទើបតែបានទិញរថយន្តថ្មីស្រឡាងមួយគ្រឿង ដែលល្អជាងគេ និងមានតលៃថ្លៃទៀតផង។ តើលោកអ្នកគិតថា  នឹងចាក់សាំងអន់បំផុត ហើយមិនរវល់នឹងប្តូរប្រេងម៉ាស៊ីន ឬក៏មិនអើពើទាល់តែសោះនឹងត្រួតពិនិត្យតាមការណែនាំរបស់ក្រុមហ៊ុននោះ? ពិតជាមិនដូច្នោះឡើយ! ប្រសិនបើលោកអ្នកបានចំណាយប្រាក់ត្រឹមតែជាង ៩0 000 (ប្រាំបួនម៉ឺន) ដុល្លារ សម្រាប់រថយន្តដ៏ទំនើបមួយនេះ  លោកអ្នកយកចិត្តទុកដាក់ថែរក្សាវាឲ្យបានល្អអស់ពីចិត្តទៅហើយ។

រីឯរាងកាយរបស់មនុស្ស មានដំណើរការល្អជាង ស្មុគស្មាញជាង និងវិសេស​វិសាលជាងយានយន្តណាៗទាំងអស់ នៅលើពិភពលោកនេះ។ រាងកាយរបស់យើងមានការអស្ចារ្យ និងការតាក់តែងយ៉ាងប្រណីតលើសពីគ្រឿងយន្តណាៗទាំងអស់។ សូមលោកអ្នកគិតអំពីភាពអស្ចារ្យនៃកោសិកាមួយគ្រាប់ វាមានភាពស្មុគស្មាញនៃខួរក្បាល  ភាពសាំញ៉ាំនៃបេះដូង ឬការអស្ចារ្យរបស់ព្រះ ទាក់ទងនឹងកំណើតរបស់យើង។ មនុស្សយើងជាស្នាព្រះហស្តដែលព្រះបានរៀបចំតាក់តែងដោយប្រុងប្រយ័ត្ន។ ព្រះអាទិករដែល   ពោរពេញទៅដោយសេចក្ដីស្រឡាញ់របស់យើង បានបង្កើតយើងដែលត្រូវប្រើប្រេងឥន្ធនៈល្អជាងរថយន្តទៅទៀត ​ដើម្បី​ផ្តល់ថាមពលដល់ជីវិតរបស់យើង ហើយប្រេងឥន្ធនៈនោះ​ បានមកពី​ចំណី​អាហារ​ដែលយើងបរិភោគជាប្រចាំ។ ប្រសិនបើគ្មានសាំងស៊ុពែរនៅក្នុងរថយន្តទំនើបទេ ការធ្វើដំណើរ​ក៏មិនបានឆ្ងាយដែរ ថាមពល​ក៏បាត់បង់​ហើយម៉ាស៊ីនក៏មិនអាចដំណើរការរលូនទៅបានដែរ។ ហើយប្រសិនបើគ្មាន​អាហារ ​រូបត្ថម្ភត្រឹមត្រូវទេ នោះរាងកាយរបស់យើងក៏មិនអាចដំណើរការទៅបានល្អដែរ។

ដូច្នេះ របបអាហារដែលមានតុល្យភាពមួយ​ ដែលបានជ្រើសមកពីអាហារដ៏ល្អបំផុត​ នឹងផ្តល់នូវ​សារធាតុ​ចិញ្ចឹមដ៏សំខាន់ចាំបាច់ ដែលរាងកាយត្រូវការសម្រាប់​លូតលាស់ ការថែរក្សា និងផ្តល់ថាមពល។ នៅពេល​ដែល​យើងជ្រើសរើសអាហារ​ដែលមានគុណភាពទាប ​ឬមិនបានបរិភោគអាហារដ៏ល្អបំផុតឲ្យបានគ្រប់គ្រាន់ គ្រឿងម៉ាស៊ីននៃរាងកាយយើង ក៏ទទួលរងការឈឺចាប់ដែរ។ ហើយប្រសិនបើយើងបិរភោគអាហារ​ដែល​បាន​ចម្រាញ់រួចច្រើនពេក​ យើងក៏ងាយនឹងទៅជាធាត់​ ហើយនិងខ្វះសារធាតុចិញ្ចឹម សំខាន់ៗផងដែរ។ ព្រះដែលបានបង្កើត​យើងមក​​ ទ្រង់យកព្រះទ័យទុកដាក់ចំពោះសុខភាពរបស់យើងណាស់ ​ដូច្នេះ​យើង​ក៏គួរតែ​យកចិត្តទុកដាក់អំពីបញ្ហាសុខភាពខ្លួនឯងផងដែរ។ លោកសាវ័ក យ៉ូហាន ​បានអធិស្ឋានយ៉ាងដូច្នេះថា «អ្នកស្ងួនភ្ងាអើយ ខ្ញុំប្រាថ្នា​ចង់ឲ្យ​អ្នករាល់គ្នា បានចម្រើនឡើងគ្រប់ជំពូក ​ហើយឲ្យ​បាន​សុខសប្បាយខាងរូបសាច់ ដូចជាព្រលឹងអ្នក​បាន​ចម្រើន​ឡើងដែរ» (យ៉ូហានទី៣ ខ ២)។

អស់លោកអ្នកស្ដាប់ជាទីមេត្រី!  ជាបន្តទៀត នាងខ្ញុំ សូមជំរាបជូនពី ការយល់អំពីចំណីអាហារដែលមានជីវជាតិល្អ។ តើអាហារបែបណាដែលចាត់ទុកថា ជាអាហារដែលមានជីវជាតិល្អជាងគេ? យើងចាក់ប្រេងសាំងឲ្យរាងកាយរបស់យើង ដោយចំណីអាហារដែលយើងជ្រើសរើសដើម្បី​បរិភោគ។ ចំណីអាហារទាំងនោះផ្តល់នូវសារធាតុចិញ្ចឹមសំខាន់ៗ ដល់ជីវិតដែលមានសុខភាពល្អ និង​មានការ​ចម្រើន​លូតលាស់។ ការរំលាយអាហារមានដំណើរការយ៉ាងស្មុគស្មាញ នៃការបំបែកអាហារ​ឲ្យទៅ​ជា​ផ្នែកតូចៗ ​សម្រាប់​ស្ថាបនា​រាងកាយ​ ដើម្បីឲ្យរាងកាយអាចប្រើអាហារទាំងនេះ ​សម្រាប់​ទ្រទ្រង់​ជីវិត។ ដំណើរការនេះបានចាប់ផ្តើមនៅក្នុងមាត់ ហើយរំកិលចូល​ទៅក្នុងក្រពះ ​បន្ទាប់​មក​ចូល​ទៅ​ក្នុង​​ពោះវៀន​តូច ហើយទីបំផុតទៅពោះវៀន​ធំ។