សុខភាព ១១ អំណាចនៃសេចក្តីជំនឿក្នុងការព្យាបាល | Voice of Hope Studio

 Health & Welfare Chapter 11 The Power of Healing by Faith | Voice of Hope Studio

អ្នកស្រាវជ្រាវបានពិនិត្យទំនាក់ទំនងរវាងសេចក្ដីជំនឿ និងសុខភាពអស់ពេលជាច្រើនទសវត្សរ៍​។ សព្វថ្ងៃនេះ យើងមានភស្តុតាងច្រើនឡើងៗ ដែលបញ្ជាក់ថា ជំនឿ អាចធ្វើឱ្យសុខភាពរបស់យើងខុសបាន​ល្អ​ប្រសើរឡើង។ ជំនឿទៅលើព្រះដ៏ពិតដែលស្រឡាញ់យើង ហើយមានតែសេចក្តីល្អបំផុតសម្រាប់យើងនៅក្នុងព្រះទ័យទ្រង់ ជំនឿនេះមានឥទ្ធិពលវិជ្ជមានដល់ទាំងសុខភាពខាងផ្លូវកាយ និងផ្លូវចិត្តរបស់យើង។ អ្វីដែលយើងជឿអំពីព្រះ មានឥទ្ធិពលដល់គ្រប់វិស័យនៃជីវិតរបស់យើង។ ជំនឿ និងការអនុវត្តន៍ខាងព្រលឹងវិញ្ញាណរបស់យើង ធ្វើឱ្យសុខុមាលភាពរបស់យើងមានការខុសប្លែកទាំងស្រុង​។ ដូច្នេះជីវិតខាងព្រលឹងវិញ្ញាណរបស់យើងដើរតួយ៉ាងសំខាន់ ក្នុងការកំណត់សុខភាពទូទៅរបស់យើង ជាងការដែលយើងធ្លាប់បានដឹងកន្លងមក។

ទោះបីជាការស្រាវជ្រាវនេះនៅតែធ្វើបន្តក៏ដោយ ក៏យើងបានដឹងយ៉ាងច្បាស់ថាសេចក្ដីជំនឿក៏មានសារៈសំខាន់ណាស់ដែរ។ ខាងក្រោមនេះគឺជាគំរូ​អំពីអ្វីដែលពួកអ្នកស្រាវជ្រាវបានរកឃើញថា កម្រិតខាងសេចក្តីជំនឿបែបណាមួយ ដែល​អាចព្យាបាលលោក​អ្នកបានពីបញ្ហា ឬជំងឺដូចខាងក្រោមនេះ:

          ទី១​. ភាពតានតឹងខាងផ្លូវចិត្ត: ដែលហៅ​ថា “Stress”​ ការសិក្សាដ៏ទូលំទូលាយមួយបានធ្វើឡើងនៅទីក្រុង Alameda រដ្ឋ California បានតាមដានរបៀបរស់នៅរបស់អ្នកស្រុក​ California ជិត៧០០០ នាក់​។ គេបានរកឃើញថា អ្នកថ្វាយបង្គំព្រះនៅឆ្នេរសមុទ្រភាគខាងលិច ដែលបានចូលរួមក្នុងសកម្មភាពជួយឧបត្ថម្ភរបស់ព្រះវិហារ មានការតានតឹងខាងផ្លូវចិត្ត អំពីហិរញ្ញវត្ថុ សុខភាព និងការខ្វល់ខ្វាយប្រចាំថ្ងៃដទៃទៀត តិចជាងអ្នកដែលគ្មានសេចក្តីជំនឿ។

ទី២. សម្ពាធឈាម: នៅក្នុងការសិក្សានៃសាកលវិទ្យាល័យ Duke បានរកឃើញថា ពលរដ្ឋចាស់​ៗ​ដែលបានចូលរួមនៅក្នុងកម្មវិធីសាសនា អធិស្ឋាន ឬអានព្រះគម្ពីរជាប្រចាំមានសម្ពាធឈាមទាបជាងអ្នកដែលមិនបានអនុវត្តកិច្ចការទាំងនេះ។

          ទី៣. ការជាសះស្បើយឡើងវិញ: ការសិក្សានៅសាកលវិទ្យាល័យ Duke ដដែល  បានរកឃើញថា អ្នកជំងឺដែលគោរពប្រណិបត័ន៍ដល់ព្រះជាម្ចាស់ អាចជាសះស្បើយឡើងវិញពីការវះកាត់ធំៗ ដោយចំណាយជាមធ្យម១១ថ្ងៃក្នុងមន្ទីរពេទ្យតែប៉ុណ្ណោះ បើប្រៀបធៀបជាមួយនឹងអ្នកជំងឺដែលមិនជឿលើសាសនា ដែលពួកគេចំណាយពេលរហូតដល់២៥ថ្ងៃនៅមន្ទីរពេទ្យ។

          ទី៤. ភាពសុំានឹងរោគ: ការស្រាវជ្រាវលើមនុស្សពេញវ័យចំនួន១៧០០នាក់ បានរកឃើញថា អ្នកដែលចូលរួមក្នុងកម្មវិធីសាសនា ហាក់ដូចជាមិនសូវមានការកើនឡើងនៃកម្រិត Interleukin-6 ជាសារធាតុដែលរាងកាយបញ្ចេញ ជាមួយនឹងជំងឺរ៉ាំរ៉ៃនោះឡើយ។

ទី៥. របៀបរស់នៅ: ការពិនិត្យសរុបឡើងវិញទៅលើការសិក្សាជាច្រើន បានបង្ហាញថា សេចក្តីជំនឿបានភ្ជាប់ជាមួយអត្រានៃការធ្វើអត្តឃាតទាប ការសេពគ្រឿងស្រវឹងតិច និងគ្រឿងញៀនតិច ការប្រព្រឹត្តិបទឧក្រិដ្ឋតិច មានការលែងលះតិច និងមានសេចក្តីសុខសាន្តជាច្រើននៅក្នុងចំណោមក្រុមគ្រួសារវិញ។

          ៦. ការបាក់ទឹកចិត្ត: យោងតាមការសិក្សានៃសាកលវិទ្យាល័យ Columbia បានឲ្យ​ដឹងថា ស្ត្រី ដែលមានម្តាយជាអ្នក «កាន់សាសនា» មានការធ្លាក់ទឹកចិត្តតិចជាងអ្នកដែលមានម្តាយមិនកាន់សាសនា ដល់ទៅ​៦០ភាគរយ។ កូនស្រីដែលកាន់សាសនានៅក្នុងនិកាយដូចម្តាយរបស់គេ រងគ្រោះដោយជំងឺបាក់ទឹកចិត្តតិចជាងអ្នកដែលមិនកាន់សាសនា ដល់ទៅ​៧១ភាគរយ ខណៈដែលកូនប្រុសមានជំងឺបាក់ទឹកចិត្តនេះតិចជាងរហូតដល់ ៨៤ភាគរយ។