សុខភាព ១០ ការម្រាក | Voice of Hope Studio

Health & Welfare Chapter 10  Rest | Voice of Hope Studio

រឿងរ៉ាវនៅសតវត្សទី១៨ និងទី​១៩ នៅក្នុង​ប្រទេសអង់គ្លេស ពួកអ្នកគ្រប់គ្រងរោងចក្របាន​លួចពេលវេលាពីកម្មកររបស់ខ្លួន។ អ្នកចាត់ការទូទៅបាន​រុញទ្រនិចនាឡិកាថយក្រោយ នៅពេលដែល​ថ្ងៃចេះតែរំកិលទៅមុខ បង្ខំឱ្យកម្មករដ៏ក្រីក្រ​របស់​ខ្លួន​ធ្វើការច្រើនម៉ោង ដោយគ្មានប្រាក់បន្ថែម។ គម្រោងមួយទៀតពាក់ព័ន្ធនឹងការរំកិលទ្រនិចនាទីឲ្យលោតបីដង ក្នុងរយៈពេលមួយនាទីនៅពេល បាយថ្ងៃត្រង់ ធ្វើដូច្នេះដើម្បីកាត់បន្ថយរយៈពេលឈប់សម្រាក។ ការអនុវត្តន៍បែបនេះបានប្លន់កម្មករនូវផលិតផលមួយ ដែលយើងមិនអាចបង្កើតបាន គឺពេលវេលា​។

យើងអាចនឹងបាត់បង់ប្រាក់នៅក្នុងទីផ្សារភាគហ៊ុន ឬក្នុងការវិនិយោគមិនល្អផ្សេងៗ ប៉ុន្តែពេលខ្លះយើងអាចទទួលវាត្រឡប់មកវិញ។ ឬប្រសិនបើយើងបាត់បង់សុខភាពរបស់យើង ពេលខ្លះយើងអាចទទួលបានមកវិញ តាមរយៈការយកចិត្តទុកដាក់ព្យាបាល របបអាហារ និងការហាត់ប្រាណត្រឹមត្រូវ។ ប៉ុន្តែពេលវេលាដែលបាត់បង់ ឬត្រូវគេលួច ទោះជាមួយនាទី មួយថ្ងៃ ឬមួយសប្តាហ៍ក្តី គឺបាត់បង់រហូតមិនត្រឡប់មកវិញឡើយ។ នៅក្នុងខ្សែភាពយន្តរឿងដែល​មាន​ចំណង​ជើងថា​ “នៅក្នុងពេលមួយ“ (in time) ដែល​ចេញ​នៅ​ឆ្នាំ២០១១ សង្គមគ្រប់គ្រងដំណើរការនៃភាពចាស់ ដើម្បីជៀសវាងកំណើនប្រជាជនច្រើនហួស។ បុគ្គលម្នាក់ៗដែលមានប្រាក់ និងទ្រព្យសម្បត្តិច្រើន អាចទិញរយៈពេលយូរនៃជីវិត បានច្រើនជាងអ្នកក្រ។ ទោះជាយ៉ាងណាក៏ដោយ អ្វីៗអាចធ្វើបានតែនៅក្នុងរឿងប្រឌិតប៉ុណ្ណោះ តែមិនអាចធ្វើបាននៅក្នុងជីវិតពិតនោះទេ។ គ្មាននរណាម្នាក់អាចទិញពេលវេលាបានឡើយ។

          នាឡិកាប៉ោលបន្លឺសំឡេងតិកតក់ៗ ឆ្ពោះទៅមុខ ដោយមិនគិតពីអ្វីដែលយើងបានធ្វើនោះឡើយ ។ ការងារមកពីគ្រប់ទិសទីត្របាក់លេបយកពេលវេលារបស់យើង ដូចជាចោរឆក់យកកាបូបចេញពីហោប៉ៅរបស់យើងអញ្ចឹងដែរ​។ ទូរស័ព្ទដែលមានល្បឿនលឿន បច្ចេកវិជ្ជាអេឡិចត្រូនិចលឿនជាងមុន បណ្តាញ internet លឿនជាងមុន និង Computer ទំនើបៗរហ័សទាន់ចិត្ត តែហាក់ដូចជាមិនបានបន្ថែមពេលវេលាឲ្យយើងដដែល។